МАҚТААРАЛДЫҚ 152 ОҚУШЫ ЕМДІК-САУЫҚТЫРУ ШИПАЖАЙЫНА АТТАНДЫ

Мақтаарал ауданындағы топан судан зардап шеккен Жеңіс, Нұрлы жол, Жантақсай, Жаңа тұрмыс, Өргебас, Фердауси ауылдарының дәрігерлік есепте тұрған және көпбалалы отбасыдан шыққан 152 оқушысы «Сарыағаш» емдік сауықтыру шипажайына демалысқа аттанды. Бұл игілікті іске Түркістан облыстық қоғамдық денсаулық басқармасы ұйытқы болып отыр.
Оқушыларды шипажайға апару ісі Қ.Мүсірепов атындағы жалпы орта мектебі директорының тәрбие ісі жөніндегі орынбасары Б.Нысанбаев, Қ.Аманжолов атындағы жалпы орта мектебінің медициналық бикесі және «Сарыағаш» емдік сауықтыру шипажайының дәрігерлеріне жүктелді. Яғни, оқушыларды шығарып салу үшін барлық қауіпсіздік шаралары қолға алынып, жол полициясы, жедел жәрдем қызметі де жұмылдырылған.
Оқушыларды шығарып салу шарасына қатысқан Мақтаарал аудандық білім бөлімінің басшысы Мұратбек Серікбаевтың айтуынша, санаторийде оқушылардың қашықтықтан оқыту ісі жалғасын тауып, еш кедергісіз оқу жылын аяқтап шығатындығын атап өтті.
Айта кетейік, қазіргі таңда топан судан зардап шеккен 5 ауылдың 2624-і Атакент кенті 8 эвакуациялық пунктерге орналастырылған. Оның ішінде 1598-і ересек, 770-і мектеп оқушылары, 256-сы мектеп жасына жетпеген балалар. Қалған эвакуацияланған тұрғындар ағайын-туыстарының үйлерінде тұрып жатыр.
Аудандағы су басқан Жеңіс, Нұрлы жол, Жантақсай, Жаңа тұрмыс, Өргебас, Фердауси ауылдарында бұған дейін 5 мектеп орналасса, бұл білім ұяларында 1820 оқушы дәріс алып келген. Сонымен қатар, 6 балабақша жұмыс істеп келсе, онда 425 бүлдіршін тәрбиеленіпті. Қазіргі таңда бұл оқушылар мен бүлдіршіндер эвакуациялық орталықтарда орналасып, қашықтықтан оқыту жүйесі арқылы білім алуда.
Су тасқынынан зардап шеккен тұрғындардың оқушыларын баспаналары толық бітіп, жаңа баспаналарына жайғасқанға дейін Қазақстан аумағындағы демалыс-сауықтыру лагерлерінде қызықты уақыт өткізулері ұйымдастырылатын болады.
Бүгін 152 оқушыдан бөлек, эвакуацияланған тұрғындардың арасынан 47 зейнеткер мен созылмалы ауруы бар бір топ науқас «Біркөлік» сауықтыру оңалту кешеніне демалысқа жіберілді. Алдағы екі аптада оларға да ем-дом шаралары көрсетіледі.

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.