Азарсың, жұртым, азарсың,

Азарыңның белгісі:

Заман ақыр адамы

Менмен шығар деп еді.

Үй басына тақ еткен

Келін шығар деп еді.

Келісімен кіржиіп,

Саяқ шығар деп еді.

Бір уысқа толмайтын

Аяқ шығар деп еді.

Қай жақ болса – қонысың,

Сол жақ шығар деп еді.

Бұзау, тайынша, танаға

Жүк артылар деп еді.

Өзі болған жігітке

Қыз артылар деп еді.

Көкек айы болғанда,

Кемпір күйлер деп еді.

Ендігінің қатыны

Байын билер деп еді.

«Туған байым болар! » -деп,

Аруақ шығар деп еді.

Сол аруақтың ішінен

Ыңғайы жоқ жаманның

Пышағы мен шақпағы,

Қалып шығар деп еді.

Бес қойға алған өгізің

Тегін дерсің деп еді.

Егін егіп, тарының

Сөгін жерсің деп еді.

Алысқа деген қамыстан

Үй шығады деп еді.

Сол үйіңнің ішінен

Құныс жауырын, қой бұтты,

Би шығады деп еді,-деп

                                толғапты.