Бірінші орта салмақта абсолютті әлем чемпионы Теренс Кроуфорд Сауль Альвареске 118-110 ұпай беріп, жекпе-жекті мексикалықтың пайдасына шешкен төрешіні жұмыстан босатуды талап етті, деп хабарлайды Nur.kz порталы.

«118-110 деген төрешіні мүмкіндігінше тезірек жұмыстан босату керек»,  — деп жазды Кроуфорд Twitter парақшасында.

Альвареске жақтасқан төрешінің аты-жөні — Эделейд Берд. Ал Дэйв Моретти 115-113 есебімен жеңісті Головкинге берген болатын. Үшінші төреші Дон Трелл 114-114 деген нәтиже шығарды.

Естеріңізге сала кетейік, бүгін Лас-Вегастағы T-Mobile аренасында өткен бокс кешінің басты кездесуі — Головкин мен Канело арасындағы жекпе-жек 12 раундқа созылып, ешкім күтпеген нәтижемен аяқталған еді.

Төрешілер екі боксшының қайсысы басым болғанын анық көрсетпей, тең түсті деген баға берді. 

Осылайша, 37 жекпе-жегін тек жеңіспен аяқтап келген Головкин спорттағы мансабында алғаш рет теңдей жұдырықтасты.

Ал осы уақытқа дейін 49 кездесу өткізіп үлгерген «Канело» осымен екінші рет қарсыласымен тең түсті деген нәтиже көрсетті.

Дереккөз: Nur.kz