Желіде ШҚО-ның Аягөз ауданында қалың шегірткенің көшіп бара жатқаны түсірілген видео тарады, деп хабарлайды qazaqjoy.kz BAQ.kz —ға сілтеме жасап.
Ал облыстық агроөнеркәсіптік кешен саласындағы аумақтық инспекциясы өкілдері биыл шегірткенің көп екенін, олармен күрес жүріп жатқанын айтып отыр.
«Аягөз ауданының аумағында су жиналатын қамысты орындар көп. Сондықтан мұндай жерлерде шегірткелер тез көбейеді. Қазір біз аумақты зиянкестерден тазалаудамыз. Аягөз ауданында 26 мың гектар жерде тиісті шаралар жүргіздік. Шегірткені жою жұмыстары жалғасуда», — дейді өсімдіктерді қорғау бөлімінің бас маманы Гүлжан Құсайынова.
Сонымен қатар, аталған инспекция бөлімі Үржар ауданында да шегірткемен күресті жалғастыруда. Қазіргі таңда 7,2 мың гектар жер залалсыздандырылған.