Есеп беруші үкімет болуы үшін, оны сұраушы депутат болуы керек. Ал сұраушы депутат болуы үшін, тапсырма беретін халық болуы тиіс. Осылай деген ҚР Парламенті Мәжілісінің депутаты Қайнар Абасов бүгін «AMANAT» партиясы Түркістан облыстық филиалында жиын өткізіп, өңірдің аграрлық саласы бойынша өзекті мәселелерді талқылады. Отырысты партияның аймақтық филиалының төрағасы Алтынсары Үмбетәлиев ашып, жүргізіп отырды.

Кездесуге салаға жауапты өңірлік басқармалар мен департамент басшылары, аудан және қала әкімдерінің орынбасарлары, жергілікті шаруалар, сондай-ақ БАҚ өкілдері қатысты. Алдымен облыстық ауыл шаруашылығы басқармасы басшысының у.м.а. Н.Мырзахметовтың 2022 жылы атқарылған жұмыстары туралы хабарламасы тыңдалды.

Айтуынша, ауыл шаруашылығы саласында айтарлықтай өсім бар. Оның ішінде егін және мал шаруашылығы, ет экспорты бойынша Түркістан өңірі жетекші орында. 2022 жылдың 11 айында ауыл шаруашылығында жалпы өнім көлемі 996,3 млрд. теңгені құрап, 101,2 % артты. Республикадағы үлесі 11,4 % яғни 3-орын. Ауыл шаруашылығы дақылдары 859,9 мың гектарға орналастырылып, егіс көлемі өткен жылдан 14,4 мың гектарға ұлғайған.

Дегенмен, Н.Мырзахметов шешімін күткен мәселелерге де тоқталды. Түркістан облысы Республика бойынша мақта өсіретін жалғыз аймақ. Оны әрі қарай дамыту үшін инвестициялық субсидиялау бағдарламасына «Шитті мақтаны өңдеу, терең қайта өңдеу кәсіпорындарын құру және кеңейту» паспортын енгізу, салымдарды өтеу үлесін 50 % субсидиялауды қарастыру, тозығы жеткен құрал-жабдықтарды жаңарту қажет. Саланың өзге де бағыттарында шаруаларды қолдау бойынша шаралар және тарифтерді төмендетуді ұсынды.

Осы мәселелерді жалғаған шаруалар да орын алып жатқан кемшіліктерді атап, күн панельдері мен ұңғымаға субсидия беру, ағын су тапшылығын шешу, жайылым, өнімдерді экспорттауға қолдау көрсету жөнінде ұсыныстарын білдірді. Жиында облыстық жер қатынастары басқармасының басшысы Е.Тілеген ортақ жайылыммен қамтамасыз ету барысы туралы баяндап, сауалдарға жауап берді. Депутат Қ.Абасов шаруалар мен жергілікті атқарушы билік өкілдерін тыңдай келе көтерілген мәселелерді дау-дамайсыз бірлесіп шешуге үндеді.

— Бүгін өзекті мәселелерді талқыладық. Оларды шешу үшін ең әуелі қаржыландыру, мұнан соң жеңіл және тамақ өнеркәсібін дамытуды күшейту, қажетті техникамен қамтамасыз ету, жерді тиімді пайдалану жүйесін жетілдіру керек. Азық-түлік өнімдерінің бағасын дүкеннің сөресінде реттеу мүмкін емес. Оның шешімі — өндіріс орындарын көбейтуде. Проблемаларды министрліктер мен тиісті құзіретті органдар алдында көтеріп келемін. Сіздердің ұсыныстарыңыз нақты болғаны жөн. Ол депутаттық сауалнаманы жолдауда сараптау және бюджетті жоспарлау барысында өз тиімділігін көрсетеді. Қажеттілік туындаса жауапты министрмен өңірге арнайы келіп, бетпе-бет жүздестіруге дайынмын. Барлық проблема «AMANAT» партиясының Жол картасына енгізілетін болса, ең алдымен Мемлекет басшысы, кейін Үкімет пен депутаттардың яғни, үш жақты қадағалауда болады. Заң шығаратын депутат болса, ал депутатқа жол сілтейтін – халық, — деді Қайнар Бегалыұлы.

«Ауыл аманаты» партиялық жобасы мен «Жер аманаты» комиссиясына да қатысты сұрақтар талқыланып, күн тәртібіндегі мәселе бойынша ұсыныстар хаттамаға енгізілді. Мәжіліс соңында қатысушылар қоян-қолтық жұмыс атқаруға уағдаласып, тарқасты.

«AMANAT» партиясы Түркістан облыстық филиалының баспасөз қызметі