«Абай ауданына қарасты 34 елді мекеннің 33-і сапалы ауызсумен қамтылған. Ал, электр жарығы 31 елді мекенде толық жүргізілген. Жыл соңына дейін Абай ауданына қарасты елді мекендерді 100 пайыз ауыз сумен және электр жарығымен қамту көзделіп отыр». Бұл туралы бүгін Шымкент қаласы мәслихатының кезекті жиырма бірінші сессиясында Абай ауданының әкімі Б.Парманов мәлімдеді.

Сессияда Шымкент қаласы мәслихатының депутаттары күн тәртібіндегі 22 мәселені қарап, тиісті шешімдерді қабылдады. Шымкент қаласы әкімінің орынбасары М.Исахов қатысқан жиынға Шымкент қалалық мәслихатының хатшысы Б.Нарымбетов төрағалық етті.

Сессия барысында «2022-2024 жылдарға арналған Шымкент қаласының бюджеті туралы» Шымкент қаласы мәслихатының шешіміне бірқатар өзгерістер енгізілді.  Сонымен қатар, қалаға қарасты Абай, Әл-Фараби, Еңбекші, Қаратау ауданы әкімдерінің есебі тыңдалды. Ал, Шымкент қалалық денсаулық сақтау басқармасының басшысы Н.Асылбеков саланы дамыту жоспарымен таныстырды.

— Шымкент қаласы бойынша 13 мемлекеттік емхана 600 мыңнан астам тұрғынға қызмет көрсетсе, 31 жекеменшік емханада 507 мың тіркелген.  Алайда, 2025 жылға дейін қалаға 6 емхана керек деп қарастырылып отыр. Бұл емханалардың құрылысына инвестиция тарту жұмыстары жүргізілуде. Сонымен қатар, республикалық бюджет есебінен 2025 жылға дейін 200 төсек-орынды перзентхана салу мәселесі де қаралып жатыр, — деп атап өтті қаланың бас дәрігері.

Сессияда, сондай-ақ, «Шымкент қаласы бойынша жерлеудің және зираттарды күтіп ұстау ісін ұйымдастырудың қағидаларын бекіту туралы», «Шымкент қаласында жануарларды аулаудың, уақытша ұстаудың және жансыздандырудың қағидаларын бекіту туралы»,   «Шымкент қаласының аумағында жануарларды асырау қағидасын бекіту туралы» шешімдерге өзгерістер енгізілді.

Айта кетейік, бұл жолы сессияға қатысқан 29 депутаттың 3-уі онлайн қатысу мүмкіндігіне ие болды. Алдағы сессияларда 5 депутатқа дейін қашықтан қатысуға рұқсат берілмек.

«Шымкент келбеті»

Суреттерді түсірген Серік ҚОСАЕВ