Былтырдан бастап 10-тамыз Абай күні деп белгіленген. Бұл дата қазақтың бас ақыны, ағартушысы, жазушысы Абай Құнанбайұлының құрметіне белгіленген. Бұл күнде қалың қазақ елін қаталдықпен емес, қаламынан шыққан туындылары арқылы қамшылаған хакім Абай шығармаларын барынша насихаттау мақсатында түрлі шаралар атап өтіледі. Ұлы ақынның асыл сөздері ұран етілген сол шараларда біз хакім Абайдың артына өшпестей із қалдырып кеткен асыл тұлға екеніне тағы бір көз жеткіземіз. Соның бірі оның он жылға жуық уақыт бойы жазылған қырық бес қара сөзі.

Осыдан бір ғасырдан астам уақыт бұрын жазылса да оның әрбір қара сөзінде айтылған ой мен терең талдау әлі күнге дейін маңыздылығын жоймаған. Мысалы, Абай Құнанбайұлының төртінші қара сөзіндегі «Әуелі Құдайға сыйынып, екінші өз қайратыңа сүйеніп, еңбегіңді сау, еңбек қылсаң, қара жер де береді, құр тастамайды» деген сөзі соның жарқын мысалы. Осы бір сөз жолдарынан-ақ ойшыл ақынның көкірек көзі ашық дара тұлға болғанын түсіну қиын емес. Ендеше қазақтың маңдайына біткен шоқтығы биік асыл тұлғаның есімін ардақ тұтып қана қоймай, шығармаларын да оқып, көңілге тоқып жүрейік, деп хабарлайды qazaqjoly.kz.